अख्तियारद्वारा १ लाख घुस रकम सहित रंगेहात महानगरपालिका शिक्षा फाँटका २ अधिकृत सहित ३ पक्राउ

बीरगंज/ ४, असोज / अख्तियार दुरुपयोग अनुसन्धान आयोगले सेवाग्राहीसँग १ लाख घुस लिएको अवस्थामा वीरगंज महानगरपालिकाको शिक्षा समन्वय इकाईमा कार्यरत २ जना कर्मचारी सहित ३ जनालाई पक्राउ गरेको छ । महानगरपालिका कार्यलयको शिक्षा शाखाका प्रमुख मन्जुर आलम, शाखा अधिकृत शशि भुषण साह कानु

 र उनका भतिजा अरुण साहलाई नगद १ लाख रुपैया सहित अख्तियारको टोलीले रंगेहात पक्राउ गरेको हो । वीरगंज १४ बहुअरीका जावेद एकवाल हैदरले संचालन गर्न लागेको फुरकान इन्टरनेशनल एकेडेमी स्कूलको अनुमतिपत्रका लागि ५ लाख रुपैया घुस मागेको र अन्त्यमा १ लाख रुपैयामा कुरा मिलेपछि घुस वापतको रकम बुझाई रहेको अवस्थामा निजहरुलाई रंगेहात पक्राउ गरेको अख्तियारले जनाईएको छ । अख्तियार दुरुपयोग अनुसन्धान आयोग हेटौडाबाट खटिएको टोलीले उनीहरुलाई महानगरपालिकाको कार्यलयबाटै रंगेहात पक्राउ गरेको छ । जावेद एकवाल हैदरले स्कूलको अनुमतिपत्रका लागि ५ लाख रुपैया घुस मागेको उजुरी अख्तियारमा दिएपछि घुस वापतको १ लाख रकम वीरगंजको लाठ गल्लीमा रहेको विस्मिल्लाह होटलमा आज महानगरपालिकाका शाखा अधिकृत शशि भुषण साहका भतिजा अरुण साहलाई पिडित पक्षले बुझाउने क्रममा अख्तियारको टोलीले निजलाई रंगेहात पक्राउ गरेको थियो । अरुणको वयानको आधारमा मन्ुजुर र शशि भुषणलाई पक्राउ गरीएको अख्तियारको टोलीले जनाएको छ । पक्राउ परेका अभियुक्तहरु आजै थप अनुसन्धानका लागि अख्तियार दुरुपयोग अनुसन्धान आयोग काठमाण्डौमा पठाईने जनाईएको छ । यस अघि अख्तियार दुरुपयोग अनुसन्धान आयोगको टोलीले वीरगंज महानगरपालिकाको आर्थिक बर्ष २०७३÷०७४मा भए गरेका विकास निर्माणका योजनाहरुमा अनियमितता भएको उजुरी परेपछि सम्पूर्ण फाईलहरु नियन्त्रणमा लिई अनुसन्धानका लागि लिएर गएको थियो । अख्तियार दुरुपयोग अनुसन्धान आयोगको टोलीले विगत २ बर्ष अगाडी जिल्ला कार्यालय वारामा अधिकृतको रुपमा रहेका मन्जुर आलम, शशि भुषण साह कानु लाई भ्रष्टाचार गरेको आरोपमा पक्राउ गरेको र सर्वोच्चबाट भ्रष्टाचारको मुद्दामा सफाई पाएपछि पुनः पदमा बहाली भई बीरगंज आएका थिए ।