गृह मन्त्रालयले गर्‍याे ६ जिल्लाका प्रमुख जिल्ला अधिकारी हेरफेर

आवश्यकता अनुसार केही जिल्लाका प्रमुख जिल्ला अधिकारी हेरफेर गरिएको गृह–प्रवक्ता (सह–सचिव) रामकृष्ण सुवेदीले रातोपाटीलाई जानकारी दिए । उनले भने, ‘मन्त्रालयको आवश्यकता अनुसार केही जिल्लाका प्रमुख जिल्ला अधिकारीको सरुवा भएको छ, जुन हाम्रो निममित प्रक्रिया नै हो ।’

रौतहटका प्रमुख जिल्ला अधिकारी गोविन्द रिजाल दाङ सरुवा भएका छन् । दाङका प्रजिअ गजेन्द्र बहादुर श्रेष्ठ भने गोरखा सरुवा भएका छन् ।

उप–सचिव प्रमुख जिल्ला अधिकारी हुने जिल्लाहरु अर्घाखाँची र मनाङका प्रमुख जिल्ला अधिकारी पनि परिवर्तन भएका छन् । मन्त्रालयमा कार्यरत प्रेमलाल लामिछानेलाई अर्घाखाँची र रुद्रनाथ देवकोटालाई मनाङको प्रमुख जिल्ला अधिकारीको रुपमा सरुवा गरिएको मन्त्रालय स्रोतले जनाएको छ । यसअधि धनुषाको कामु प्रमुख जिल्ला अधिकारी चलाएका लामिछाने मन्त्रालयमा कार्यरत थिए ।

मन्त्रालयले शुक्रवार साँझ हेरेफेर गरेका प्रमुख जिल्ला अधिकारी मध्ये पर्साका लोकनाथ पौडल छोटो समयमा नै परिवर्न गरिएका प्रजिअ हुन् । पौडेललाई गत वैशाखामा पर्सा पठाइएको थियो ।

सह–सचिवलाई सरुवा अवधि नलाग्ने हुनाले परिणाममुखी काम नगरेको भन्दै मन्त्रालयले पौडेललाई छोटो समयमा नै परिवतर्न गरेको बताइएको छ ।

‘सेकेन्ड क्लास’ अफिसरलाई दुई वर्ष भन्दा कम समयमा प्रमुख जिल्ला अधिकारीबाट सरुवा गर्न नमिल्ने सरुवा नियमावलीमा ब्यवस्था भएपनि मन्त्रालयले १५–१६ महिना मात्र अवधि पूरा गरेका अर्घाखाँची र मनाङको प्रमुख जिल्ला अधिकारी परिवर्तन गरेको छ ।