निर्वाचनको मत सर्वेक्षण गरिए कारबाही हुन्छः प्रमुख निर्वाचन आयुक्त /* - - - Script for Auto Navigation - - - */

निर्वाचनको मत सर्वेक्षण गरिए कारबाही हुन्छः प्रमुख निर्वाचन आयुक्त

काठमाडाै‌, मंसिर ११


प्रमुख निर्वाचन आयुक्त डा. अयोधीप्रसाद यादवले प्रतिनिधिसभा तथा प्रदेशसभा सदस्य निर्वाचनलाई आधार मानेर मत सर्वेक्षण गर्न नहुने बताएका छन्।


विहिबार निर्वाचन आयोगमा सञ्चारकर्मीसँग कुरा गर्दै प्रमुख आयुक्त यादवले कुनै माध्यम वा संस्थाले मत सर्वेक्षण गरेको पाइए कार्वाही गरिने चेतावनी दिए।

प्रतिनिधिसभा तथा प्रदेशसभा सदस्यको पहिलो चरणको मतदान सम्पन्न भएको र दोस्रो चरणको मतदान यही मंसिर २१ गते हुन लागेको सन्दर्भमा निर्वाचनलाई लिएर मत सर्वेक्षण गरिनु निर्वाचन आचारसंहिताविपरीत हुने उनको भनाई थियो।

निर्वाचन आचारसंहितामा उम्मेदवारको मनोनयन दर्ता भएको मितिदेखि मत परिणामको घोषणा नभएसम्म उम्मेदवार वा राजनीतिक दलको परिणामको सम्बन्धमा मत सर्वेक्षण गर्न वा त्यस्तो सर्वेक्षणको परिणाम घोषणा गर्न नहुने उल्लेख छ।

निर्वाचन आचारसंहिताविपरीत कसैले निर्वाचनलाई लिएर मत सर्वेक्षण गरेमा निर्वाचन आचारसंहिता उल्लंघन गरेबापतको कारबाही हुने डा. यादवले बताए।

उनले भने, 'निर्वाचन आचारसंहिताविपरीत गरिने त्यस्ता मत सर्वेक्षणबाट स्वच्छ, स्वतन्त्र र विश्वसनीय निर्वाचन सम्पन्न गराउने कार्यमा समेत नकारात्मक प्रभाव पर्छ। त्यस्ता मत सर्वेक्षणलाई सञ्चारमाध्यममा स्थान नदिनसमेत म आम सञ्चारमाध्यमसँग आग्रह गर्दछु।'

रासस



कमेन्टस



सम्बन्धित तस्विरहरु







Rautahat Media Pvt. Ltd.

Gaur - 8, Rautahat
Nepal
Tel : 0977-55-521595
URL: http://www.rautahatonline.com
Email: rautahatonline@gmail.com

Editor: Praveen Kumar Sharma
Cell: 9801023044

1867708 times visited !
संचालन तथा प्रायोजनको हक सर्बाधिकार © रौतहट अनलाईन २०७३ मा सुरक्षित रहनेछ ।
Top