हरिप्रसाद र सोमप्रसाद: काठमाडौंबाट पाल्पा पुगेपछि छुट्टियो बाटो /* - - - Script for Auto Navigation - - - */

हरिप्रसाद र सोमप्रसाद: काठमाडौंबाट पाल्पा पुगेपछि छुट्टियो बाटो

बुटवल, कार्तिक २२


सोमप्रसाद पाण्डे र हरिप्रसाद नेपाल संविधानसभाको दोस्रो चुनावमा पाल्पा क्षेत्र नम्बर २ र ३ बाट निर्वाचित भए। ४ वर्ष सँगै संसदमा रहे। मंसिर २१ गते हुने प्रतिनिधि सभाको चुनावमा भिड्न फेरि दुवैले आ–आफ्नो पार्टीबाट टिकट पाए। रोचक के भयो भने, राजधानीबाट जिल्ला फर्कने क्रममा विमानस्थलमा सोमप्रसाद र हरिप्रसादको भेट भयो। भैरहवासम्म दुवै जना एउटै जहाजमा सँगै सिटमा बसेर आए। अनि भैरहवाबाट पाल्पा पनि एउटै मोटरमा पुगे। पाल्पा पुगेपछि दुवै फरक–फरक समूहमा सामेल भए। उनीहरूको राजनीतिक बाटो छुट्टियो।

कार्तिक १६ गते आ–आफ्नो पार्टीका दलबलसहित पाल्पा क्षेत्र नम्बर २ बाट उम्मेदवारी दर्ता गरेपछि आधिकारिक रुपमा एक अर्काका प्रतिस्पर्धी बने।

नयाँ संरचना अनुसार पाल्पाको निर्वाचन क्षेत्र तीनबाट घटेर अहिले दुई वटा भएको छ। त्यसैले पहिले अलग मैदानमा रहेका पाण्डे र नेपाल अहिले एउटै मैदानमा आम्ने साम्ने भएका छन्।

मानौं यसअघि सेमिफाइनलमा विजयी भए र अब फाइनलका लागि प्रतिस्पर्धा गर्दैछन्। मंसिर २१ गते हुने उपाधि भिडन्तपछि एकजनाले संसदमा प्रवेश पाउने छन् भने अर्को संसद बाहिर।

सदरमुकाम तानसेनसमेत पर्ने पाल्पा क्षेत्र नम्बर २ मा वाम गठबन्धनबाट एमालेका केन्द्रीय सदस्य सोमप्रसाद पाण्डे र लोकतान्त्रीक गठबन्धनबाट कांग्रेसका केन्द्रीय सदस्य हरिप्रसाद नेपालबीचको प्रतिस्पर्धा पनि कम रोचक छैन।

भैरहवाबाट एउटै मोटरमा पाल्पा जाँदै सोमप्रसाद र हरिप्रसाद

२०५१ र २०५६ को चुनावबाट समेत सांसद बनेका सोमप्रसाद पाण्डे राजनीतिमा आउनुअघि शिक्षण र कानूनी पेशामा थिए। उनी पाल्पा मदनपोखराको दमकडा माविको प्रधानाध्यापक र बार एशोसिएसनको जिल्ला अध्यक्ष समेत भए। ०६४ को संविधानसभा चुनावमा पराजित भएका पाण्डे ०७० मा पाल्पा २ बाट निर्वाचित भएर उद्योग मन्त्रीसमेत बने। एमाले बरिष्ठ नेता माधव नेपालका सम्धी पाण्डे पाँचौं पटक चुनावी प्रतिस्पर्धामा उत्रिएका छन् भने चौथो जितको खोजिमा छन्।

जिल्लामा २ वटा क्षेत्र मात्र भएपछि पाण्डेका लागि अहिलेको निर्वाचन क्षेत्रमा केही भूभाग नयाँ छन्। साविकको तान्सेन नगरपालिका र २१ वटा गाविस उनका लागि नयाँ ठाउँ हो। साविक क्षेत्र नम्बर २ मा रहेका १४ गाविस भने अहिले पनि उनीसँगै छ।

पाण्डे भन्दा पहिले २०४८ मै सांसद पड्काएका थिए हरिप्रसाद नेपालले। २०५१ र २०६४ मा भने उनी पराजित भए। ०५६ मा टिकट नै पाएनन्। नेपालले शिक्षक र सरकारको उपसचिव भएर पनि काम गरे। तर बहुदलीय व्यवस्थाको पक्षमा बीपी कोइरालाले आह्वान गरेपछि उनी जागिर र विद्यावारिधिको तयारी छोडेर २०३६ सालको आन्दोलनमा होमिए। २ पटक सांसद भइसकेका हरिप्रसाद नेपाल ह्याट्रिक गर्ने दाउका साथ मैदान उत्रिएका छन्। हरि नेपालको लागि तानसेन नगरपालिका सहित अधिकांश भूभाग पहिले आफूले जितेकै क्षेत्र पर्दछ। पुरानो संरचना अनुसारका १४ गाविस नयाँ भूभाग हुन्।

पाल्पा क्षेत्र नम्बर २ मा अहिले तान्सेन नगरपालिकाका ८ नम्बर बाहेकका सबै वडा, तिनाउ गाउँपालिकाको ५ नम्बर बाहेक सबै वडा, बग्नासकाली गाउँपालिका, रिब्दीकोट गाउँपालिका र रैनादेवी छहरा गाउँपालिका पर्छन्। 

वाम गठबन्धनको प्रभाव
स्थानीय चुनावको नतिजा अनुसार पाल्पा क्षेत्र नम्बर २ मा एमाले–माओवादी केन्द्रबीचको गठबन्धन बलियो देखिएको छ।

स्थानीय चुनावमा ५ वटा स्थानीय तहका प्रमुखका उम्मेदवारले पाएको मत अनुसार एमाले र माओवादी केन्द्रको मत ३५ हजार जति हुन आउँछ। कांग्रेसका प्रमुखका उम्मेदवारले कुल २५ हजार जति मत प्राप्त गरेका छन्। तर त्यसमा नयाँ थपिएका मतदाता, वाम तालमेलको प्रभावले कति मत तलमाथि पर्छ भन्ने कुरामा धेरैको चासो छ।

एमालेले उम्मेदवार पाण्डे पाल्पा २ आफ्ना लागि सहज क्षेत्र ठान्छन्। ‘जिल्लाको पश्चिमी भेग मेरा लागि नयाँ भएपनि मतदाताले विश्वास गर्नेछन्’, उनी भन्छन् ‘वाम गठबन्धनले झन् सहज बनाएको छ।’

कांग्रेस उम्मेदवार हरिप्रसाद नेपाल पनि वाम गठबन्धन आफूलाई चुनौति नभएको दावी गर्छन्। ‘यो लोकतान्त्रिक र कम्युनिष्ट शासनबीचको प्रतिस्पर्धा हो, कृतिम गठबन्धन नरुचाउने कार्यकर्ता त्यहीँभित्र छन्, उनीहरुले पनि मलाई भोट दिँदैछन्’, उनले भने, ‘विगतका कामको मूल्याङकनले गरेर फेरि पनि मतदाताले मलाई नै छान्छन् भन्ने विश्वास छ।’

चुनावी मुद्दाः खानेपानी र पहिरो
पाल्पामा क्षेत्र नम्बर २ मा तान्सेनको खानेपानी समस्या, सिद्धबाबा क्षेत्रको सडकमा पहिरो, पर्यटीय विकास उम्मेदका मुख्य चुनावी एजेण्डा हुन्। एमाले उम्मेदवार पाण्डेले चुनाव जितेमा ३ वर्षभित्र खानेपानी, विद्युत र बाटो घाटोको समस्या समाधान गर्ने आश्वासन दिएका छन्।

‘तान्सेनको खानेपानी समस्या र सिद्धबाबा क्षेत्रको पहिरोको समाधान मेरो पहिलो प्राथमिकता हुनेछ’, पाण्डेले भने, ‘ऐतिहासिक तान्सेनलाई मौलिक स्वरुपमै नयाँ रुप दिएर पाल्पालाई पर्यटक र शिक्षाको हबको रुपमा विकास गर्नेछु ।’

कांग्रेसका उम्मेदवार हरिप्रसाद नेपालले पनि खानेपानी र सिद्धबाबाको पहिरोको समस्यालाई नै चुनावी एजेण्डा बनाएका छन्।

‘सिद्धबाबा क्षेत्रको पहिरो मेरो पहिलो प्राथमिकतामा पर्नेछ, कालीगण्डकी तान्सेन लिफ्टिङ खानेपानीको काम डेढ वर्षमा पुरा गर्नेछु’, उनले भने ‘तानसेनमा विमानस्थलका लागि अध्ययन भइसकेको छ, निर्माण कार्य अघि बढाउने काममा लाग्नेछु।’



कमेन्टस



सम्बन्धित तस्विरहरु







Rautahat Media Pvt. Ltd.

Gaur - 8, Rautahat
Nepal
Tel : 0977-55-521595
URL: http://www.rautahatonline.com
Email: rautahatonline@gmail.com

Editor: Praveen Kumar Sharma
Cell: 9801023044

1787642 times visited !
संचालन तथा प्रायोजनको हक सर्बाधिकार © रौतहट अनलाईन २०७३ मा सुरक्षित रहनेछ ।
Top