किन टुङ्गो लाग्न सकेन राजपा नेताहरु लड्ने क्षेत्र? /* - - - Script for Auto Navigation - - - */

किन टुङ्गो लाग्न सकेन राजपा नेताहरु लड्ने क्षेत्र?

काठमाडौं, कार्तिक १५


दोस्रो चरणको निर्वाचनका लागि मनोनयनपत्र दर्ता गर्ने अघिल्लो दिनसम्म पनि राष्ट्रिय जनता पार्टीले अध्यक्ष मण्डलका नेताहरुले प्रतिस्पर्धा गर्ने क्षेत्र टुङ्ग्याउन सकेको छैन। कांग्रेससँग चुनावी तालमेल हुने नहुने कुराको टुङ्गो लाग्न नसक्नु नै राजपा नेताहरुले प्रतिस्पर्धा गर्ने क्षेत्र टुङ्गिन नसक्नुको मुख्य कारण बनेको छ।



दुई संविधान सभा निर्वाचनमा सर्लाही-६ बाट प्रतिस्पर्धा गरेका अध्यक्ष मण्डलका मुख्य नेता महन्थ ठाकुर यस पटक महोत्तरी-३ बाट प्रतिस्पर्धाको योजनामा छन्।

अघिल्लो संविधान सभामा सर्लाही-४ बाट पराजित अर्का नेता राजेन्द्र महतोपनि कांग्रेसको साथ नपाए सर्लाही छाडेर धनुषा–३ मा प्रतिस्पर्धा गर्ने योजना बनाउँदैछन्। 

तर, कांग्रेससँग गठबन्धन हुने नहुने टुङ्गो नलाग्दा महतोको निर्वाचन क्षेत्र यकिन हुन सकेको छैन।

‘कांग्रेसले समर्थन गर्ने भयो भने उहाँ सर्लाही-४ बाट प्रतिस्पर्धा गर्नुहुनेछ’ राजपाका  महामन्त्री मनिषकुमार सुमनले नेपालखबरसँग भने, ‘आज बेलुकीसम्म तालमेल भयो भने भयो, नत्र  धनुषा-३ बाट प्रतिस्पर्धा गर्नु हुनेछ।’

कांग्रेसले समर्थन नगर्दा यसपटकपनि सर्लाही ४ मा पराजयको सम्भावना देखिएपछि महतो धनुषा ३ बाट प्रतिस्पर्धा गर्ने सोचाईमा पुगेका हुन्।

यादव बहुल सो क्षेत्रका धेरैजसो राजपा नेताकार्यकर्ता माओवादी केन्द्रमा प्रवेश गरेका छन्। माओवादी केन्द्रबाट सो क्षेत्रमा पूर्वमन्त्री रामेश्वर राय यादव उम्मेदवार बन्ने सम्भावना छ।

सर्लाही छाड्ने मनस्थितिमा रहेका महतोले धनुषाको जुन क्षेत्र ताकेका छन् तर त्यहाँ कांग्रेसले बिमलेन्द्र निधिको उम्मेदवारी सार्वजनिक गरिसकेको छ।

स्थानीय तह निर्वाचनमा जनकपुर उपमहानगरपालिका लगायत धनुषामा राजपाले राम्रो प्रदर्शन गरेको छ। धनुषा–३ मा महतो आए भने आफूलाई अप्ठेरोमा पर्ने विश्लेषणका साथ निधि महतोलाई सर्लाहीमा नै रोक्ने कसरतमा छन्।

फोरम–राजपासँग चुनावी गठबन्धन टुट्ने दिशातिर केन्द्रित भएपनि महतोलाई धनुषा–३ मा आउनबाट रोक्न निधिले राजपासँगको तालमेल–वार्तालाई निरन्तरता दिएका छन्।  

अध्यक्ष मण्डलका अन्य नेताहरुमध्ये महेन्द्र राय यादव सर्लाही २ बाट उम्मेदवार बन्ने योजनमा छन् भने शरदसिंह भण्डारीले महोत्तरी २ चाहेका छन्।

राजकिशोर यादव सिरहा ४ बाट प्रतिस्पर्धाको योजनामा छन्। अध्यक्ष मण्डलका अर्का सदस्य अनिलकुमार झाचाहिँ रौतहट १ बाट प्रतिस्पर्धा गर्नेछन्।



कमेन्टस



सम्बन्धित तस्विरहरु







Rautahat Media Pvt. Ltd.

Gaur - 8, Rautahat
Nepal
Tel : 0977-55-521595
URL: http://www.rautahatonline.com
Email: rautahatonline@gmail.com

Editor: Praveen Kumar Sharma
Cell: 9801023044

1867677 times visited !
संचालन तथा प्रायोजनको हक सर्बाधिकार © रौतहट अनलाईन २०७३ मा सुरक्षित रहनेछ ।
Top